Mumaints poppigs da libertà
La Turissem Engiadina Scuol Samignun Val Müstair SA inscenescha in üna campagna da marketing la destinaziun da vacanzas in möd musical. Quasi il «finale» da quella campagna es üna chanzun da pop dal musicist Gino Clavuot, alias Snook, sur dal sentimaint da libertà illa regiun. Per quella sun in sonda gnü fattas registraziuns da chant e da video cun ün cor d’uffants a Scuol.
«Vu fraihait umgeh – das isch de moment» chantan in sonda avantmezdi bundant 60 mattas e mats da l’Engiadina Bassa, da la Val Müstair e da Samignun sül palc da la sala cumünala da Scuol. Circundà da plüs microfons, instrui da la magistra da chant Nina Mayer e registrà dal producent Mischa Weiss. Preschaint sun eir ils musicists Gino Clavuot e Dario Fallet chi taidlan ed animeschan il cor.
La Turissem Engiadina Scuol Samignun Val Müstair SA (TESSVM) ha organisà quist occurrenza: I va per registrar il refrain final e lapro amo ün video d’üna nouva chanzun da marketing per la destinaziun turistica.
400 inputs per duos strofas ed ün refrain
«Nus vain appellà a giasts ed indigens in nos newsletter, sün placats ed illas medias socialas da trametter a nus texts chi descrivan lur sentimaint da libertà quia», quinta Sarah Bünter, la respunsabla da la TESSVM per quist proget. Var 400 persunas sun seguidas a quel appel ed han formulà per la TESSVM lur imaginaziun da libertà.
Sün basa da quels texts ha il musicist Gino Clavuot alias Snook lura scrit üna chanzun da pop – las duos strofas in rumantsch, il refrain in tudais-ch. «L’idea d’eira da far üna chanzun ün pa in möd d’üna ‹boy band› cun musicists da la regiun, üna chanzun chi funcziuna bain i’l radio ed eir il context da marketing», declera’l.
Uschea sun gnüts lapro amo Dario Fallet da Müstair e Nina Mayer da Ramosch e finalmaing eir ün cor d’uffants chi rapreschainta tuot las valladas da la regiun: l’Engiadina Bassa, la Val Müstair e Samignun.
«La libertà batt’in noss cours»
La chanzun descriva singuls mumaints illa natüra. «Quels mumaints stan pel sentimaint da libertà», disch Gino Clavuot. Quai füssan per exaimpel pass tras la naiv, il sulai chi splendura in fatscha o schi’s tegna il man ün a tschel cur chi s’ha fraid.
Sainza mancanza d’üna prisa patos chanta il trio «ballain illa natüra», «il tschêl es nos cunfin». Ed insembel cul cor d’uffants lura apunta «vu fraihait umgeh – das isch de moment».
Chanzun, video e concerts
Davo la registraziun in sala cumünala s’ha il tröp da musicistas e musicists, da chantaduras e chantadurs lura amo radunà in baselgia per far ün video da la preschantaziun musicala. Per ün public da mammas e bazegners, da sours e barbas e per la camera hana là chantà amo üna jada la chanzun culs mumaints poppigs da libertà.
«Quista chanzun dess metter il focus eir sülla glieud indigena e sülla bilinguità chi’d es da gronda importanza per nossa regiun», disch Sarah Bünter da la TESSVM.
Ils prossems dis gnaran lura elavurats la chanzun finala ed il video. Previs es ün concert da premiera pro las pendicularas da Scuol giò‘n val als 29 da schner. E davo dessan la chanzun ed il video eir gnir publichats süllas plattafuormas cuntschaintas per musica e videos.
Gust da leger dapli?