Cun arabescas e liurettas

En tut ha il fegl da program annunziau 17 numras. Semegliont ad in circus, han ins saviu cumprar all’entrada in scarnuz popcorn. Offeriu quel han treis mattatschas che circulavan el foyer dalla Fermata a Falera. Cun lur combas liungas liungas han ella fatg endament il circus. Ils carschi han buca stuiu s’enclinar per prender in scarnuz cul snack classic da pausa. Igl ei stau gl’emprem schatg d’in circus. La sala ei s’emplenida cun pign e grond. Geniturs e fargliuns, tattas e tats, augs ed ondas, padrins e madretschas han buca vuliu munchentar la producziun.

Dialas nunveseivlas

Jamie Sturzenegger-Karnik ei scolasta diplomada da ballet e meina el casti Löwenberg a Schluein il Studio Sura, ina scola da ballet per affons e carschi. Dapi varga 20 onns instruescha ella e fa ina inscenaziun cun sias scolaras. La producziun da sonda vargada ei stada il resultat dils exercezis dils davos sis meins. Duas gadas ad onn dat ei ina producziun aviarta pil publicum. Per finir il semester 2024/25 ha ella fatg ina coreografia culla tematica dil circus.

Ballet munta disciplina, estetica e moviments coordinai. Che ballet ei oravontut era musica han ins astgau supponer. E quella ha accumpignau tras l’entira producziun. Dirigidas davos las culissas da dialas nunveseivlas ein las 17 numras idas ina en l’autra senza interrupziun. Sco directura da circus ei Elena Casutt sepresentada. Ella ha denton buca beneventau il publicum cun plaids, mobein cun sault. La directura cun sia bitgetta ha menau ina gruppa da saltunzas en vestgius dil temps da Vaudeville. In’autra truppa ei cumparida sin tribuna ed ha saltau tiel toc «Mississipi Rag» da Scott Joplin. Las ballerinas vestgidas en costums da harlechin han divertiu pli tard aunc ina gada cul toc «Weeping Willow» dil medem Scott Joplin.

Tener posiziun e «contenance»

Donata Ernst ha mussau, sco graziusa dama cul ballun tgietschen, ina scena culla musica «Under Paris Skies» da Jonny Kerry. Era la giuvna ballerina Yuki Woodtli ei sepresentada sco ballerina avanzada. Ellas han in potenzial nungetg – ed era tgei che ballet munta, numnadamein in sault sin in livel ault cun moviment digl entir tgierp. Malgrad quei sto la ballerina tener sidretg la posiziun. Cun tutta concentraziun ston ellas mussar ina fatscha da rir. Vestgidas en bials calzers stretgs e cun tac po quei esser stentus. Al publicum han las numeras plaschiu. Sco pli carina ei la truppa dallas liurettas semussada. Ellas han giu da far per camond alla dama cul cilinder. En ina scena han ellas saltau ina coreografia, nua ch’ellas ein sedeliberadas da lur patruna ed han fatg legher cul cilinder da quella.

Lena Camenisch e Yuki Woodtli ein sepresentadas en ina coreografia dalla Scola da circus Surselva. Cul lenziel e cul tscherchel han ellas mussau era cheu acrobatica d’in livel ault. Ellas denterscenas ha la clownessa Maria Dunst mirau da midar requisits ed indrezs. Sco el circus. Ch’il clown sappi tener il tact e la maniera cun far ses survetschs, tuttina sco las ballerinas, ei strusch pusseivel. Aschia ch’ei ha dau cuorts intermezzis divertents el decuors dalla presentaziun.