12’000 entuorn la mesapipa

Quei ch’ei el ski alpin al Lauberhorn, al Chuonisbergli ni alla Streiff, ei el sport dad aissa e freeski il Laax Open sil Crap Sogn Gion. La fin d’jamna vargada ei l’elita dils megliers separticipada allas concurrenzas spectacularas. La pli gronda mesapipa dil mund cun ses varga 200 meters lunghezia, 22 meter ladezia e siat meters altezia ha fatg tutta honur a siu renum. Sonda sera han 12’000 aspectaturas ed aspectaturs mirau il final dallas dunnas e dils umens, tschiensmellis han saviu mirar il spitachel alla televisiun. Ina retscha da canals digl entir mund, secapescha era SRF, han emess live il final dil 20 megliers «riders».

Superstar sill’aissa

Musica bumbum, aissas crusch e traviers, refrestgs e vivonda digl entir mund ed in grond program lateral han embelliu il grond festival sportiv. Tier las atletas ch’ein separticipadas allas concurrenzas ha Chloe Kim retschiert il predicat da «Grande Dame» dalla mesapipa. La massa da glieud entuorn il renomau implont da sport sil Crap Sogn Gion ha bunamein fatg vibrar la mesapipa ed aschia era motivau l’Americana da 24 onns. Ella vegni a Laax dapi ch’ella hagi nov onns, ei seigi in sentiment sensaziunal da gudignar il final dil Laax Open 2025, ha ella manegiau en ina intervesta ch’il publicum ha saviu suandar. Mellis e mellis han admirau co ella ha pigliau catsch, ei sgulada el foss e «strubigiau» piruettas siado ell’aria sco da saltar cun alas. Chloe Kim ei avanzada sco superstar sill’aissa.

A caschun digl emprem Laax Open, avon ualti exact diesch onns, haveva Reto Gurtner, il president dil cussegl d’administraziun dalla Gruppa Arena Alva (GAA), annunziau gl’event sportiv-cultic suandontamein: «Die Laax Open, eine Mountain Lifestyle Affair, die Geschichte schreiben wird». Il visiunari ha giu raschun. Sil pli tard suenter la 10avla ediziun seprofilescha Laax ina gada dapli sco mecca dils snowboardists. Talents digl entir mund aspireschan e speran d’astgar separticipar ina gada al Laax Open.

Ferma equipa giappunesa

Semegliont a Chloe Kim ei gl’Australian Scotty James tiels umens. Gl’atlet da 30 onns ei ina icona dil sport ella mesapipa. El ha gia gudignau tut quei ch’ins sa gudignar. Sonda sera ha el mussau el final ch’el ei cun 30 onns aunc buca memia vegls per quei sport. L’atmosfera a Laax seigi incumparegliabla, il publicum e la mesapipa seigien adina fenomenals, ha el getg al moderatur suenter sia victoria. Ina ferma equipa da snowboard ei quella dil Giappun. Ruka Hirano  ei vegnius secund e Ayumu Hirano tiarz. Ayumu haveva gudignau il schaner 2016, sco giuvnot da 17 onns, gl’emprem Laax Open 2016.

Buca mo ella mesapipa, era el parc da siglir ed ella disciplina freeski – sin dus skis – han 200 profis battiu per in plaz el final. La Chinesa Eileen Gu ha gudignau quel avon la Canadesa Megan Oldham e la Svizra Mathilde Gremaud. Sper las atletas ed ils atlets dalla disciplina freeski ein era ils megliers dil mund sill’aissa sigli sur las schanzas en quei parc. El final ha Mia Brookes, in’Englesa da 18 onns, gudignau la gronda part dalla premia da concurrenza da 70’000 francs. Tiels umens ha il Canades Cameron Spalding gudignau l’emprema gada il tetel da Laax Open Champion.