«Quella honur s’auda buca sulet a mi»

Sarah Calörtscher, Silvia Hofmann, Maurizio Michael, la Sursilvana Luisa Delgado ed ils Sursilvans Ciril Deplazes e Christian Loretz ein stai nominai dalla «Südostschweiz» pil premi dalla persunalitad grischuna digl onn 2024. In e scadin ha saviu dar sia vusch a sia favorita ni siu favorit. Gudignau la concurrenza ha la fin finala Christian Loretz da Mustér, il president dall’Uniun la pendenta. Il gliendisdis ha el retschiert la trofea – in capricorn ord lenn – ed il mardis ha el festivau quella honoraziun a Mustér/S. Gada. Leu ei la Pendenta numnadamein vegnida erigida e quella ei stada il motiv che Christian Loretz ei vegnius nominaus pil premi.

«Ina gronda honur»

«Quei premi ei ina gronda honur per mei. Gia la nominaziun ei stada surprendenta», di Christian Loretz. Spert aschunta el denton: «Quella honur s’auda buca sulettamein a mi. El ei il meret dall’Uniun la pendenta, respectivamein d’ina cuminonza che ha tratg il carr.»

Tonaton ei Christian Loretz era pertscharts ch’ei ha duvrau in guvernagl, in motor davon quei carr: «Quei ei aschia, mo jeu hai sentiu la motivaziun da biaras persunas da realisar quei project dalla Pendenta. Nus essan i communablamein atras buns e schliats temps.» Sco Christian Loretz tradescha, ha el apparentamein retschiert ina tiarza da tuttas vuschs dil publicum: «Ei fa secapescha plascher da sentir conta glieud che ha susteniu mei en quell’elecziun.» Nua ch’il premi en fuorma d’in capricorn ord lenn duei vegnir plazzaus sa Christian Loretz aunc buc: «Bugen havess jeu el en in liug public. Mo quel stuein nus aunc anflar.»

Il mument decisiv

Il project dalla Pendenta ha percuriu in temps buc adina sempel. Rodund sis onns ha l’Uniun la pendenta cun siu president Christian Loretz alla testa stuiu cumbatter per si’idea. «Il pli bi mument ei staus quel dalla novitad da Marcus ­Weber ch’el surprendi ils 390 000 francs che la vischnaunca haveva refusau.

Quei mument sun jeu staus segirs ch’il project sappi vegnir realisaus, schegie ch’ei muncava a nus lu aunc rodund 200 000 francs per la finanziaziun cumpleina dils rodund 1,8 milliuns francs.» Entochen la surdada dalla punt a siu intent ed alla vischnaunca avon dus meins era la summa restonta medemamein vegnida rimnada.

In proxim project sin rucca

E co va ei vinavon ussa cull’uniun? «Tenor ses statuts duess l’Uniun la pendenta vegnir sligiada suenter la realisaziun e surdada dalla punt alla vischnaunca. Persunalmein sun jeu denton dil meini ch’ella duess exister vinavon. La decisiun en quella damonda vegn prida alla radunonza generala igl avrel», di Christian Loretz. E silla damonda, tgeinin che seigi siu proxim project, relata la persunalitad digl onn 2024: «Quei liug dalla Pendenta ha potenzial per dapli, per exempel events, art ni semplamein per spassegiar. Jeu hai entginas ideas ch’ein denton aunc buca madiras per communicar.»