Las giuvnas skiunzas svizras a Breil

«Igl interess per organisar cuorsas da FIS ei buca sgarscheivel gronds», gi Remo ­Veraguth. El ei responsabels enteifer igl SST per la sparta alpina. Igl SST ei la reuniun dils clubs da skis sursilvans che promova denter auter il sport da prestaziun da giuvnas e giuvens skiunzs. Quei ei era in dils motiv che Remo Veraguth s’engascha sco menader da concurrenza per la cuorsa da Super G dils 22 da schaner 2025 el territori da skis da Breil.

Gia igl onn vargau

Gia igl onn vargau ein skiunzas svizras semiseradas en in Super G sin la medema pista e quei il meins mars. «Las cuorsas sin nivel da FIS (Federaziun internaziunalada skis) ein fetg impurtontas per las skiunzas.» Tenor las explicaziuns da Remo Veraguth legitimeschan bunas prestaziuns ellas cuorsas da FIS las giuvnas skiunzas da far il pass ella cuppa europeica. Reusseschan ellas leu lu ei il pass ella cuppa mundiala buca lunsch naven.

E per ella cuppa mundiala setschentan las sportistas ed ils sportists giuvens el focus dalla publicitad. E cun ellas era ils loghens ch’organiseschan las cuorsas. Sco exempel vala la skiunza svizra Malorie Blanc che ha gudignau la cuorsa FIS igl onn vargau a Breil e che anflau la via sil podest dalla cuppa mundiala l’entschatta schaner 2025 el Super G da St. Anton.

Campiunadi svizzer dallas junioras

La cuorsa da Super G dils 22 da schaner 2025 vala gest aunc sco campiunadi svizzer dallas junioras dallas categorias U18 ed U20, sco quei che Remo Veraguth tradescha. Treis skiunzas sursilvanas san separticipar alla cuorsa da FIS, numnadamein Lara Bianchi da Sursaissa, annada 2008, Elena Stucki (annada 2004) da Flond ch’ei commembra dil cader B dalla equipa naziunala svizra e ch’ei gia da casa ella cuppa europeica e Pia Veraguth da Vuorz dall’annada 2007. Che Pia Veraguth ei la feglia da Remo Veraguth intimescha el secapescha vinavon da s’engaschar per la cuorsa da FIS. Deplorablamein ei Pia Veraguth pil mument blessada e sto renunziar alla cuorsa da casa.

S’annunziadas per la cuorsa ein 70 curridras che vegnan cun ina excepziun tuttas dalla Svizra. «Las cuorsas da spertadad da descensiun e Super G ein buca talmein tschercadas tier las giuvnas da quella vegliadetgna», gi il menader alpin digl SST. Aschia che la participaziun al Super G ed al campiunadi svizzer ei surveseivla. Tuttina puntuescha Remo Veraguth ch’il nivel e la concurrenza denter las giuvnas svizras seigi ault.

Buca senza club

La cuorsa da FIS digl onn vargau a Breil ha igl SST organisau. Quei ei tenor Remo Veraguth stau ina pulita sfida, malgrad il sustegn da geniturs e parents dallas curridras. Aschia ch’el ei uonn ius alla tscherca da sustegn. Per organisaturs dalla cuorsa actuala vala il Club da skis da Vuorz ed il president da quei club, Daniel Cadonau presidiescha gest aunc il comite d’organisaziun.

Il Club a skis da Vuorz dumbra, tenor lur pagina d’internet, buca meins che 100 commembras e commembers e prest la mesadad ein activs. Tuttina eis ei buca sempel dad activar datier da 20 voluntarias e voluntaris ch’ein necessaris per organisar ina cuorsa da FIS, sco quei che Daniel Cadonau sincerescha. «Amiez la jamna ein biars buca disponibels.» Era el menziunescha las gidontras e gidonters dad auters clubs ni era geniturs dallas sportistas che sustegnan ils organisaturs. El gi ch’il Club da skis da Vuorz hagi gia duront biars onns buca pli organisau cuorsas da FIS e seigi puspei promts da s’engaschar.

Grev da survegnir ina pista

Pli grev che da motivar commembras e commembers per in engaschi per ina cuorsa eis ei da survegnir ina pista da cuorsa la fin schaner. «Biaras pendicularas ei buca promtas da metter a disposiziun ina pista cuort avon la sesiun aulta», menziuna Daniel Cadonau.

Quei conferma era Remo Veraguth che puntuescha ch’ei fussi buca pusseivel dad organisar ina cuorsa senza il sustegn dallas pendicularas e quei era pertuccont il transport da rauba. «En quei grau ein las pendiularas da Breil/Vuorz/Andiast semussadas fetg generusas.» Sustegn han ils organisaturs dalla cuorsa FIS da Surselva Turissem che ha organisau igl alloschi per curridras ed accumpignament.

Il menader alpin digl SST gi che sulet en Svizra vegnien  organisadas mintg’onn denter 40 e 50 cuorsas da FIS. «Ins s’enconuscha en quella scena da cuorsa e da leu ei era il giavisch vegnius da vinavon organisar ina cuorsa da FIS el territori da skis da Breil, Vuorz ed Andiast», puntuescha Remo Veraguth.