Optimar il menaschi dalla serenera
La Serenera Foppa a Schluein drova sustegn. Quei san ins leger el Fegl ufficial Surselva sut las vischnauncas commembras dil Consorzi d’aua piarsa Foppa. La communicaziun renda attent agl inserat ch’ei cumparius ellas medias regiunalas e cantunalas.
Tenor la publicaziun enquera il Consorzi d’aua piarsa Foppa in specialist ni ina specialista da serenera. Quella persuna supplementara dueigi rinforzar e cumplettar la squadra fidada e cumpetenta, ha Claudio Casutt confirmau sin damonda dalla FMR.
Ina dallas grondas dil Grischun
La serenera Foppa, situada sin territori da Schluein dado l’arena da ballapei Crap Gries, rimna las auas dallas vischnauncas Falera, Glion, Laax, Sagogn e Schluein. En ina reit da canalisaziun da 12 kilometers arrivan las auas piarsas, en 24 uras eis biebein 4800 cubics. Era il territori da skis da Crap Sogn Gion, Vorab e Murschetg, cun tutta infrastructura da canalisaziun, ei colligiaus culla serenera Foppa. Guido Peng e Carlo Sax, ils dus caus-serenera diplomai, ein occupai stedi cun survigilar in implont cumplex ed impurtont.
Quei pretenda ina preschientscha permanenta e survetsch da pichet. Ina cooperaziun culla serenera ASA Sablun a Rueun e culla serenera da Flem garantescha il survetsch da pichet. Per saver optimar ils process da lavur e rinforzar la squadra engascha il Consorzi d’aua piarsa Foppa ussa ina persuna dapli. Igl ei ina plazza pulit interessanta. La serenera Foppa ei ina dallas grondas dil Grischun. Denter Nadal e Daniev ed ellas vacanzas da sport ein tochen 25 000 persunas ella regiun ed gl’implont ell’Isla da Schluein lavura cun microbiologia, ristials, crivels, mecanica ed electronica. Tenor gl’inserat ha la persuna tschercada la pusseivladad da far la scolaziun da guardia-serenera e cau-serenera cun diplom federal.
Gust da leger dapli?