In unviern cun biaras e novas experientschas

Als campiunadis mundials da cuorsa liunga dils juniors avon in onn a Planica en Slovenia ha Jon-Fadri Nufer (20) mussau duas fetg bunas prestaziuns. Ton ella cuorsa da 10 km classic sco en quella da 20 km skating ha el contonschiu igl 11avel rang. Grazia a quellas rangaziuns, mo era ad autras bunas prestaziuns, ei il commember dil Club da skis Sedrun-Tujetsch sequalificaus pil cader C da Swiss Ski.

A quel appartegn era siu far Cla-Ursin che ha giu da sbatter ils dus davos onns cun las difficultads d’in surtrenament. «Per mei ei Cla-Ursin adina staus era empauet ina locomotiva. Jeu hai viu tgei ch’el ha contonschiu, mo era tgei ch’ei drova per arrivar en in cader da Swiss Ski», di Jon-Fadri Nufer ch’ei treis onns pli giuvens che siu frar. Suenter igl emprendissadi da miradur ha el eligiu la medema via sco Cla-Ursin ed ei sedecidius da seconcentrar cumpleinamein silla cuorsa liunga.

Prioritad alla cuorsa liunga

Sco Cla-Ursin habitescha era Jon-Fadri il mument a Tavau: «Biars buns curriders ein dacasa cheu era la stad. Aschia hai jeu la pusseivladad da profitar dad els els trenaments.» Jon-Fadri Nufer appartegn alla gruppa da trenament 3 da Swiss Ski: «Ell’emprema gruppa ein las curridras ed ils curriders dil Cup mundial ed ella gruppa 2 ils giuvens ch’ein empau pli avanzai. Cun lezza gruppa trenein nus stedi.»

Trenader da Jon-Fadri Nufer ei negina auter ch’igl anteriur currider d’elita e Sursilvan Toni Livers: «Magari savein nus era tschintschar empau romontsch denter nus.» Avon che far il pass el cader C era il Tuatschin commember dil cader regiunal dalla Surselva. Il segl el cader da Swiss Ski ei staus cumbinaus cun bein enqual midada: «Quei ei secapescha tut bia pli professiunal. Il grond avantatg ei il trenament communabel cun biars buns curriders.» Cun plirs auters curriders da sia vegliadetgna serenda Jon-Fadri Nufer igl avrel ella scola da recruta dil sport d’elita.

Classic – la tecnica preferida

L’entschatta dalla stagiun actuala ei buca reussida a Jon-Fadri Nufer sco giavischau: «L’entschatta digl unviern va ei tier mei adina vess da vegnir en fuorma. Pli ditg che la stagiun cuoza e meglier ch’ei vegn. Ussa semesirel jeu buca pli culs curriders sut 20 onns, mobein cun pli vegls, per part treis onns pli vegls. La concurrenza ei secapescha bia pli gronda.» En cuorsas dil Cup Continental en Germania e l’Italia ei reussiu ad el in siatavel plaz ed ulteriuras rangaziuns denters ils megliers 10 e 20.

Als campiunadis svizzers sil Pass dil Jaun eis el daventaus 12avel el sprint: «Ella cuorsa da distanza sun jeu ruclaus gia all’entschatta e hai aschia piars il contact culla gruppa dalla testa.» La fin finala ha ei tunschiu pil 14avel plaz. La tecnica preferida da Jon-Fadri Nufer ei la classica: «Naturalmein ch’jeu mon era cuorsas da skating, mo lezza tecnica ei aunc buca perfetga tier mei.»  

Surselva Maraton e campiunadi mundial

Igl onn vargau ei Jon-Fadri Nufer sequalificaus l’emprema ga pil campiunadi mundial dils juniors. Il gliendisdis ha el survegniu la nova, ch’el sappi separticipar danovamein a quels. Swiss Ski ha selecziunau il Tuatschin per las concurrenzas l’entschatta fevrer a Schilpario ell’Italia. Uonn parta el ella categoria dils juniors sut 23 onns, quei ch’ei ina nova sfida: «En quella categoria sun jeu in dils giuvens. Rangaziuns sut ils emprems 20 fussen gia fetg bunas.»

Tonaton dat ei aunc autras finamiras per questa stagiun: «Ina ei segiramein ina buna rangaziun al Surselva Maraton da dumengia proxima.» Igl onn vargau ha el contonschiu il tierz rang a Sedrun ed in plaz da podest ei la finamira minimala d’uonn: «Quella cuorsa gudignass jeu bugen.»

Dil reminent: Gudignau il Surselva Maraton igl onn vargau ha siu trenader Toni Livers. Il fevrer e mars suondan allura aunc entginas cuorsas dil Cup Continental, eventualmein era il Swiss Cup, mo lu era la davosa part dils campiunadis svizzers culla cuorsa roiala da 50 km el Goms: «Quei vegn ad esser mi’emprema cuorsa sur quella distanza.» Jon-Fadri Nufer preferescha distanzas liungas dil sprint.