Leger il «Dudesch»

Per il mument è il FC Lugano a la testa da la Super League svizra – il «pitschen» Lugano. Schegea ch’ils budgets effectivs da las squadras da ballape n’èn betg adina tant transparents. Il club tessinais aveva fatg bancrut avant 20 onns, tutga entant però ad in investur american. Dapi diesch onns gioga il FC Lugano puspè en la pli auta liga svizra, cun success. Sche la squadra enturn il giugader naziunal Renato Steffen fa quest onn vinavant furora, lura fissi schizunt pussaivel ch’ella daventia campiun svizzer, per la terza giada en l’istorgia dal club (suenter 1938, 1941 e 1949). – I fiss ina sensaziun!

Ch’il FC Lugano ha success per il mument, quai ha el d’engraziar senza dubi er al trenader Mattia Croci-Torti. Igl è vairamain remartgabel tge ch’il Tessinais ha fatg or da questa squadra. Ma tgi è quest Mattia Croci-Torti atgnamain, quest trenader detg emoziunal che porta adina in chapè cun ala?

Tgi che vuless savair dapli dad el, po leger l’ediziun actuala dal «Zwölf»! Quai è ina revista per fans da ballape (ils fans èn gea il dudeschavel «um» en la squadra, perquai il num «Zwölf»). L’illustrada accumpogna dapi 18 onns cun bler viz, nostalgia, istorgias a l’ur ed era cun inschign investigativ il ballape svizzer e mundial. Dal 2007 èn perfin dus Grischuns, Sandro Danilo Spadini e Gian-Andri ­Casutt, stads ils dus capo-iniziants da la revista che cumpara sis giadas l’onn.

La 106avla ediziun cuntegn apunta il purtret da Mattia Croci-Torti. Il trenader tradescha tranter auter che …

Ma legiai sezs quest purtret ubain anc autras istorgias «ballapedistas» en la nova ediziun da «Zwölf». Quella pon ins empustar (print u digital) sur il webshop da la revista, nua ch’ins pudess era gist daventar in/a da var 5000 abunentas ed abunents.