Hotel Castell ho nouvs proprietaris – l’art resta però

L’Hotel Castell es ün da duos hotels da quatter stailas a Zuoz ed es situo marcantamaing sün ün grip i’l god e dadour il cumün. Scu cha’l nom tradescha già sumaglia l’edifizi marcant da l’architect Nicolaus Hartmann jun. ad ün chastè, ho però causa ün incendi l’an 1961 pers sieus tets a pizs, las tuorinas e’ls balcuns torts. Oriundamaing es il Castell gnieu fabricho l’an 1912 scu chesa da cura da l’impressari ed hotelier zuozingher Hermann Gilli ed ho pü tard scu hotel – causa las guerras mundielas – gieu temps pü glorius e temps pü difficils. Traunter il 1955 e’l 1989 d’eira perfin la Migros possessura dal Castell e Hotelplan l’ho gestiuno scu hotel da club.

Üna renaschentscha scu hotel d’art

Düraunt ils ultims duos decennis s’ho il Castell alura pudieu etablir scu hotel d’art e que grazcha il proprietari Ruedi Bechtler. L’impressari, artist e collecziuneder zürigais vaiva surpiglio l’hotel dal 1996 e l’ho transfurmo in ün hot spot d’art. Uschè as chatta in ed intuorn il Castell la colleziun da Bechtler cun bgeras ouvras d’artists cuntschaints. Traunter oter haun Pipilotti Rist, James Turrell e Tadashi Kawamata creo grandas ouvras d’art chi sun gnidas fattas aposta be pel Castell a Zuoz.

Nouvs proprietaris eir da la scena d’art

Scu cha la Handelszeitung ed ulteriuras medias svizras scrivan, ho l’anteriur proprietari Ruedi Bechtler vendieu l’hotel da quatter stailas superior in november 2024. Ils nouvs proprietaris sun Ursula Hauser, André Remund, ed Iwan e Manuela Wirth da la «Galerie Hauser & Wirth», la quela ho traunter oter eir già a San Murezzan üna gallaria.

Tenor ils nouvs proprietaris nu’s dess però pel mumaint müder ünguotta i’l Castell a Zuoz, na i’l management scu neir na i’l concept, scu cha la chesa vain gestiuneda. La respunsabilited generela pel Castell surpigliaro però la ditta «Artfarm» dad Iwan e Manuela Wirth, la quela gestiunescha già divers restorants in Ingialterra, Scozia, Spagna ed a Los Angeles. Il Castell a Zuoz es percunter il prüm hotel dad «Artfarm» in Svizra. (fmr/cam)