A reveir an en onn!

La Pro Senectute è en’organisaziun naziunala tgi dat gio siva da 108 onns. Activa è ella graztga allas 24 organisaziuns cantunalas. L’incumbensa principala dalla Pro Senectute è da s’angascher pigl bagnesser, pigls basigns, pigls interess, sa tgapescha er pigls dretgs da seniors e senioras. Ultra da chegl mantga tar l’organisaziun er betg igl angaschamaint per la dignitad e pigl respect dallas persungas pensiunadas. President dalla fundaziun dalla Pro Senectute è Guido Graf-Bernet, igl anteriour cunsiglier guvernativ digl cantun Lucerna. El è succedia ad Eveline Widmer-Schlumpf, l’anterioura cunsigliera federala grischuna, tg’è stada ples onns agl timung dalla fundaziun.

L’emda da skis a Beiva è populara

Igl è er uscheia tgi las secziuns dalla Pro Senectute porschan da tottas sorts curs a seniors e senioras. Chegl èn curs da computer, scu eir anturn cugl telefonign ed er curs da far gimnastica. La Pro Senectute Turitg ò aint igl sies program annual er adegna dus emdas da skis, egna a Beiva e l’otra a Grindelwald BE. L’emda da passlung ò alloura li a Clostra ed è adegna bagn occupada. L’emda da skis a Beiva è stada l’emda passada e galdia la hospitalitad da Bivians e Bivianas on 30 seniors e senioras dalla Pro Senectute Turitg. Cutier on igls Turitges e las Turitgesas gia scu gio igls davos 17 onns aint igl hotel Post tar Martina Lanz. L’emda da skis a Beiva vign stimada fitg ed è fitg populara. En maret tgi chegl è uscheia ò cunzont Walter Isak, ena persunga tgi stema fitg Surses e tgi canoscha er bagn la val. Cun Gabi Lardon e Walter Bisig segna el er pigl program da skis ed er per las occurrenzas laterals.

Ia cun skis vign an gruppas

Allas 08.15 dattigl ansolver, ma gio avant stat gimnastica segl program per tgi mintgign seia fit per eir sen pista. Cun skis vign betg ia individual, mabagn an gruppas pi pitschnas da treis anfignen quatter. «Gianto vign an cuminanza tar Franco e Nadja Giovanoli dall’ustareia da muntogna Camon», dei Walter Isak. Igl de da skis cun Marco Lanz – a Beiva igl «senior scolast da skis» – ò er betg mantgea l’emda passada tigls participants e las participantas dall’emda da skis dalla Pro Senectute Turitg. Walter Isak varda er adegna da cattar ena persunga dalla regiun tgi tigna en referat tar en tema actual. Per chest onn ò el anvido cugl deputo Fabio Luzio en om digl rom, schi sa tracta d’energeia. «Igl referat pertutgont l’energeia er ord vista da Surses e digl Grischun è sto fitg bung», dei Walter Isak. Cun esser igls seniors e las senioras da Turitg on tots e tottas naturalmaintg gia interess da saveir daple dall’energeia ed er digl EWZ. 

Cun gianellas all’Alp Flex

Er tar l’ediziun dall’emda da skis 2025 dalla Pro Senectute Turitg è sto segl program ena viandada cun gianellas. La destinaziun è stada l’Alp Flex, noua tgi senioras e seniors on galdia igl belezza de cun bler suglegl. Avant tgi sa lascher eir bagn cun bungas speisas ed en bung got ò er betg mantgea igl apero, en apero mintgamai cun en program lateral e cun galdeir la bunga cumpagneia. Ena participanta ò detg igl suandont: «Beiva è en li scu fatg per seniors e senioras, pitschen pero fegn, cun belas pistas, pistas betg schi pretensiousas, indigens ed indigenas cun ena gentilezza e cugl hotel Post scu li da cutier ena tgesa ampernevla». Menziuno seia tuttegna tgi igls participants e las participantas dall’emda da skis eran ple tgi angal fits e chegl dalla persunga la pi giovna cun 62 onns anfignen tar la pi viglia persunga cun 83 onns. Siva d’aveir gia deis dad ôr cun l’ora magnifica èn Turitges e Turitgesas partias vers tgesa: A reveir an en onn!