Lubientscha per Ovra solara Magriel

La Regenza ha dau la lubientscha per la construcziun d’in niev implont fotovoltaic grond a Mustér. Il project sebasa sigl artechel 71a dalla lescha federala d’energia, igl aschinumnau «Solarexpress». Quei artechel ei vegnius scaffius dil parlament federal igl atun 2022 culla finamira da puder realisar spert e nuncumplicau implonts fotovoltaics gronds aultalpins.

Las votantas ed ils votants da Mustér han approbau ils 22 d’october 2023 il project dall’Ovra solara Magriel SA. Il perimeter dil project cumpeglia rodund 13,5 hectaras ed ei situaus en in territori sin 2100 meters sur mar che vegn gia utilisaus turisticamein. Sin quella surfatscha el territori da Magriel duein 20570 moduls solars producir electricitad per rodund 3000 casadas. Quei ein ver 14,6 uras gigawatt per onn cun ina cumpart d‘electricitad producida duront igl unviern da strusch 5,4 uras gigawatt. (cdm/fmr)