Il Miraval per il persunal

Actualmein discuora la Lumnezia d’in hotel niev ch’ei duei dar sil parcadi dallas pendicularas a Vella. Leu ei gia il hotel Pellas ed el futur duess ina surbaghegiada cun garaschas sutterranas cumplettar la purschida, scaffir letgs novs e mitigar la munconza da letgs da hotel en Lumnezia. Sco quei che Gian Derungs, in dils iniziants dall’idea, conferma alla FMR, s’avonza il project dil hotel a Vella, la gruppa d’interess seigi vidlunder d’elaborar quel. A Cumbel ei ina immobiglia existenta seprofilada avon varga diesch onns sco purschida nova pil turissem e cun combras da hotel. Suenter la bardigliada el niev Da Casa Val Lumnezia a Vella ha la casa da vegls e da tgira Miraval piars sia funcziun. Gl’onn 2014 ha la vischnaunca Lumnezia vendiu il cumplex als dus impressaris indigens Gion Martin Collenberg e Daniel Blumenthal. Per la cumpra havevan quels fundau la societad Val Verda SA, quella ei aunc oz proprietaria dalla parcella e baghetgs Miraval.

Dau risposta

Gia cun cumprar l’immobiglia han ils investurs vuliu esser transparents cun communicar lur intenziuns: Essend ch’il prezi da cumpra seigi staus favureivels, la substanza dil baghetg buna, il manteniment exemplarics e la survesta magnifica seigi beinspert naschida l’idea da realisar in sempel hotel da treis steilas e da cumplettar il baghetg cun tschun habitaziuns pintgas per indigens. Quei ha Daniel Blumenthal declarau ils 9 d’october 2014 alla gasetta La Quotidiana. Igl ei stau il mument che la societad ha inoltrau la damonda per la lubientscha da baghegiar. Finamira eis ei stau da realisar in hotel cun 80 letgs. Tenor Daniel Blumenthal era ei previu da transformar la casa en in hotel cun ina purschida per famiglias ed adattau al turissem migeivel.

In onn pli tard, gl’atun 2015, han ils proprietaris annunziau ch’il project seigi realisaus ed il hotel Miraval arvi silla stagiun 2015/16. Cull’avertura han ils dus impressaris e socis dalla Val Verda SA vuliu dar ina risposta alla discussiun cuntinuada en Lumnezia ch’ei maunchi in menaschi turistic cun capacitad mesauna ed infrastructura adattada. Sco gestiunari haveva la societad gudignau Robert Elvedi permiert. Quel ha surpriu la direcziun ensemen cun Maria Angela Collenberg, ina gastronoma professiunala. Ina dallas novaziuns dil hotel Miraval ei stada la cumbinaziun da combras da hotel e habitaziuns. Ils investurs han la finala scaffiu 50 letgs da hotel e 30 per las habitaziuns administradas.

Negin problem d’occupar

Diesch onns pli tard ei la situaziun semidada. Il hotel ei oz ina casa da persunal tschercada. Suenter sia transformaziun d’ina casa da vegls e da tgira en in menaschi turistic ha la casa Miraval a Cumbel ina funcziun nuotameins impurtonta per la vallada. Ils emploiai dallas interpresas da baghegiar e dil mistregn, ed era dil Da Casa Val Lumnezia, havevan breigias d’anflar alloschi. En quei senn ha la casa Miraval surpriu ina funcziun nova sco casa da persunal. Suenter la mort da siu bab Gion Martin Collenberg gl’avrel 2022, ha Maria Angela Collenberg surpriu il presidi dalla societad Val Verda SA. Ella meina era l’administraziun ed affittescha las diesch combras grondas dublas, las 15 singulas sco era las nov habitaziuns. Ei seigi negin problem d’occupar las combras ed era las habitaziuns, ha il conpossessur Daniel Blumenthal sincerau alla FMR.