Prümas abitaziuns SCHI

La vschinauncha da Segl ho dit SCHI a l’iniziativa chi voul scumander da müder prümas abitaziuns in seguondas abitaziuns. A la radunanza cumünela da marculdi, ils 22 schner 2025 haun las 167 persunas preschaintas voto per scrutini. 91 haun dit SCHI, 74 NA, duos cedlas sun restedas vödas.

Sainza üna tela ledscha pudessan bundant 61 prümas abitaziuns gnir müdedas in seguondas – que tenor la suprastanza cumünela da Segl. Ün argumaint dals aderents ed aderentas es, cha cun la situaziun actuela da la manchaunza d’abitaziuns per indigens, saja quist ün prüm pass per fer frunt al problem. Pels adversaris ed adversarias da l’iniziativa percunter saja da tschercher ün’otra soluziun. Que cun fabricher dapü abitaziuns, e na cun chastier ils possessuors e las possessuras da las abitaziuns pertuchedas.

L’iniziativa ho pissero l’ultim temp per grandas discussiuns: Qualchüns vessan gugent gieu üna soluziun pü disferenzcheda e pondereda, tschertünas üna soluziun radicala. Düraunt ils ultims trais mais e mez sun gnidas inoltredas in tuot 14 dumandas da transcripziun.

Manchaunza da spazi da viver

La manchaunza da spazi da viver per indigens ed indigenas pissera in Engiadin’Ota per grandas discussiuns. Differentas vschinaunchas tscherchan egnas soluziuns per cumbatter il problem, uscheja eir la vschinauncha da Segl. In gün 2024 vaiva la suprastanza cumünela proponieu da scumander la transcripziun da prümas abitaziuns in seguondas abitaziuns. Tar construcziuns nouvas staun tenor la proposta impü 50 % da la surfatscha ster a disposiziun per abitaziuns per indigens ed indigenas. Quella proposta d’eira però gnida sbütteda sainza insomma entrer in discussiun. In november 2024 es alura gnida inoltreda üna nouva iniziativa cun 138 suottascripziuns valablas chi’d es uossa gnida accepteda.

Üngünas barchas cun motor electric

A l’iniziativa per üna fasa da pilot da trais ans per motors electrics sül lej ha Segl dit NA cun 70 vuschs cunter 58 vuschs. In tuot s’haun 128 persunas partecipedas a quista decisiun. L’iniziativa vess vulieu pussibiliter per üna fasa da pilot da trais ans l’adöver da barchas cun motor electric. Que surtuot pella pas-cha, uscheja il co-iniziant Antonio Walther. El argumantescha cha’s pudess reguler meglder la forella canadaisa chi’d ho decimo las otras spezchas da peschs i’l Lej da Segl cun quistas barchas. Ün oter argumaint saja cha’ls motors electrics dessan fer damain canera cu ils motors da benzin.

Adversaria da l’iniziativa es steda l’organisaziun Pro Lej da Segl. Quella voul preserver il lej scu que ch’el es. Scu cha’l president Duri Bezzola declera, s’avriss cun quista iniziativa üna porta per abüs. L’organisaziun temma cha’l trafic da barchas a motor electric pudess esser grand e disturber la pêsch dal Lej da Segl düraunt la fasa da pilot.