Success per curridras grischunas
Ier dumengia ha giu liug a Sedrun il 35avel Maraton Surselva. Circa 200 curridras e curriders da cuorsa liunga ein separticipai en las differentas categorias da vegliadetgna alla concurrenza da Swiss Loppet. Il Maraton Surselva quenta ultra da quei era pil Cup svizzer. Ils megliers resultats dil Grischun el maraton dallas dunnas e dils umens han Seraina Boner e Toni Livers contonschiu.
Aunc la sonda encunter sera era Guido Friberg, il schef dil comite d’organisaziun dil Maraton Surselva buca dil tut segirs co la participaziun vegni ad esser la dumengia, cunquei che l’aura dalla dumengia avonmiezdi era tut auter che empermettenta. Cun 200 participontas e participonts ha il Surselva Maraton giu uonn pli paucs ch’ils onns vargai. Ils resuns dalla curridras e dils curriders davart la qualitad dalla loipa ein denton stai trasatras positivs.
Fermas dunnas grischunas
Ellas categorias dallas dunnas han las Grischunas acquistau ils megliers resultats el maraton da 25 kilometers. Seraina Boner, anteriura campiunessa svizra el stil liber sur 5 kilometers ha victorisau ella cuorsa dallas dunnas cun in avantatg da strusch duas minutas sin la giuvna Lina Bundi da Sogn Murezzi ch’ei ida tras l’arrivada cun in avantatg da mo quater secundas sin Nina Cantieni da Samedan.
Ferma concurrenza grazia al cup svizzer
Il maraton dils umens ha Jan Fässler da Ebnat-Kappel ch’ei era separticipaus pil Cup svizzer gudignau. Cun 58 minutas e 38 secundas ha Fässler contonschiu il meglier temps dil di dils umens avon Toni Livers che ha piars strusch quater secundas sil victur. En discuors cun la FMR ha Toni Livers discurriu d’ina buna e ferma concurrenza dils umens el Maraton Surselva: «Grazia al Cup svizzer separticipeschan era ferms curriders dalla Svizra e digl exteriur al Maraton Surselva. Quei aulza l’attractivitad e vegn era dabien als organisaturs.»
In pign, mo engrazieivel publicum
«Oz astgel jeu trer ina bilanza positiva», di Guido Friberg, il president dil comite d’organisaziun dil 35avel Maraton Surselva. «Las cuorsas dalla sonda (Raiffeisen Nordic Cup, Swiss Cup, Energia Alpina nordic cup) han giu liug cun relaziuns fantasticas. Oz dumengia havein nus giu empau dapli fastedis cull’aura.» Las cuorsas dil Swiss Loppet seigien cuorsas popularas svizras e tier quellas concurrenzas seigi la participaziun regressiva empau dapertut, di Guido Friberg.
Era a Sedrun seigien las cefras da participontas e participonts memia bassas. Perquei vegni il comite d’organisaziun dil Maraton Surselva a stuer ir sur ils cudischs per mirar co ins vegli cuntinuar cul maraton, manegia Guido Friberg. «Il pli grond problem sper la bassa participaziun ei che nus survegnin buca successurs ch’ein promts da s’engaschar sco voluntaris pil Maraton Surselva.» Era quei vegn ad esser in tema decisiv per la cuntinuaziun.
Las controllas da fluor
Al Surselva Maraton dad ier dumengia hai dau controllas dalla federaziun Swiss Ski concernent il diever da fluor per unscher ils skis. Quellas controllas han procurau per empau discussiuns ell’arrivada. Il president dil comite d’organisaziun Guido Friberg ha deplorau ch’ei ha dau entginas disqualificaziuns da curridras e curriders che havevan fastitgs da fluor vid lur skis. «Sche Swiss Ski vegn a far controllas, lu savein e vulein nus buca impedir quei. Ed il reglament da Swiss Loppet ch’ei ligionts pil Maraton Surselva scamonda dil tuttafatg il diever da fluor. Nus deplorein las disqualificaziuns, mo stuein acceptar quellas.»
La gliesta da ranganziun entira san ins consultar sin la pagina www.datasport.com.
Rangaziun Maraton Surselva 25 kilometers dallas dunnas
1. Boner Seraina SUI SAS 1:06:54
2. Bundi Lina SUI Alpina St.Moritz 1:08:26
3. Cantieni Nina SUI Piz Ot Samedan 1:08:30
4. Kudre-Schnider Daisy ESTVärska OK Peko 1:09:46
5. Pellaton Lisa SUI Brévine 1:10:33
6. Scheidegger Andrea SUI Kandersteg 1:10:34
7. Bebi Gioia SU IDavos 1:10:35
8. Barbüda Saskia SUI Lischana Scuol 1:10:41
9 .Emmenegger Céline SUI Flühli 1:10:56
10. Zimmermann Marina SUI Gonten 1:11:00
Rangaziun Maraton Surselva 25 kilometers dils umens
1. Fässler Jan SUI Ebnat-Kappel 58:38
2. Livers Toni SUI Tavau 58:42
3. Näpflin Avelino SUI Beckenried-Klewenalp 58:54
4. Buholzer Sven SUI Horw 58:55
5. Martin Tim SUI Samedan 58:59
6. Béguin Maxime SUI SAS Bern 59:02
7. Beti Elia SUI Bernina Pontresina 59:03
8. Müller Lavio SUI SAS Bern 59:04
9. Guler Jon Andri SUI Sarsura Zernez 59:05
10. Nufer Jon-Fadri SUI Sedrun-Tujetsch 59:37
11. Nufer Cla-Ursin SUI Sedrun-Tujetsch 59:46
Gust da leger dapli?