​Ei pon bu spitgar, ei pon bu spitgar

«Quellas femnas giuvnas pon buca spitgar da far giu il pigniel e metter naven la stalla. Strusch ei la fiasta da Nadal vargada ein ils pigneuls semtgai per dismetter». Quels plaids ha in augsegner giu detg avon onns a mi. Era jeu s’udevel tier ina da quellas che pudeva buca spitgar. A mi ei lu vegniu endamen co ei fuva tier nus a casa. Il pigniel steva en stiva tochen ch’el scheva pender las «alas» e las guilas semurdevan ellas soccas. La stalla denton scheva la mumma aunc star in pulit temps en stiva. Jeu less buca gest pretender tochen Nossadunna da candeilas, mo tuttina aunc enzacontas jamnas suenter Nadal.

Ussa eisi aschia ch’jeu laschel era buca star la stalla tochen ils 2 da fevrer. In aunghel ni in pastur ni schiglioc ina figura dalla stalla salvel jeu denton adina anavos pli ditg. Quei ha da far cun ina historia ch’jeu hai legiu inaga.

Enten pachetar ils treis davos aunghels dalla stalla ha la dunna da casa salvau anavos in e detg a sesezza: «Ti stattas aunc in temps cheu, jeu drovel in tec atmosfera da Nadal sur gl’entir onn ora.» Ella ha mess el sin cruna – e miracla: igl aunghel ha entschiet a discuorer. El di che mo sch’enzatgi tegni anavos ina figura da Nadal – buca perquei ch’ins vess emblidau da metter naven ella, mobein perquei ch’ins vegli propi aunc salvar in tec atmosfera da Nadal en casa – lu sappi quella figura discuorer. Quei vegni denton fetg darar avon. Ed ussa aunc il meglier: Quei aunghel che la dunna ha teniu anavos teneva buc ina candeila ni ina steila enta maun, na, el teneva in canaster da pupi enta maun. Mintgaga che la dunna da casa segrittentava sur d’enzatgei ni fageva schiglioc quitaus, teneva el vi il canaster e scheva: «Bett’en!» El mondi lu cun tut quei e deponi ei en pursepen tiel bambin il proxim Nadal.

Ina historia …… mo ins sa mai.

Forsa tuttina salvar anavos in tec atmosfera da Nadal en casa. Ed aschia in canaster da pupi che rimna dagrettas fuss naturalmein il hit. Mo per dir: Il temps da Nadal va a fin ils 2 da fevrer cun Nossadunna da candeilas.

Judith Friberg-Decurtins