L’intriga dal general

David Truttmann/FMR

Ses num è enconuschent en Svizra: Henri Guisan. Il Vaudois era stà durant la Segunda Guerra mundiala il general svizzer, damai il cumandant suprem da l’armada.

Ma tgi era stà il general du-rant l’Emprima Guerra mundiala? – Geabain, Ulrich Wille da Meilen (ZH). Ma gia adina è quai stada ina persunalitad dispitaivla, perquai ch’el simpatisava cun la Germania e perquai ch’el era pauc attaschà a la Svizra romanda. Sia elecziun sco general, ils 3 d’avust 1914, valitescha l’istoriografia oz perfin sco intriga. Sco general svizzer fiss numnadamain stà previs in militarist grischun fitg renconuschì: Theophil Sprecher (von Bernegg) da Maiavilla. Las fracziuns grondas dal Parlament federal a Berna avevan gia decis a favur dal Grischun. Ma lura èsi vegnì auter …

Tge ch’è effectivamain capità quel di d’elecziun e tgi ch’ha tratg ils fils davos las culissas, quai raquinta l’emissiun actuala da la «Zeitblende» dad SRF. Tant saja tradì: In cusseglier federal (Arthur Hoffmann, PLD) ha vulì sfurzar tras l’elecziun dad Ulrich Wille (maletg). Ed Ulrich Wille sez ha visità anc la saira da l’elecziun ses concurrent Theophil Sprecher e l’ha «mess a cor» da retrair sia candidatura. E propi, il Grischun ha declerà in’ura pli tard a las fracziuns parlamentaras da betg pli star a disposiziun per l’uffizi. Uschia che Ulrich Wille ha gì via libra ed è daventà general.

La «Zeitblende» (accessibla on-line) recapitulescha l’entira in-triga dals 3 d’avust 1914 ed empro-va era da declerar, pertge ch’il Gri-schun Theophil Sprecher è la fin dals quints atgnamain sa retratg. Igl è in pitschen crimi ch’è prest in zichel divertent en vista a la gronda mazzacra mundiala ch’è lura succedida ils proxims 4 onns.