Viver la passiùn par la disziplegna roiala

Pocs ca san: sut la staziùn da Tusàn e egn studio da musica. Là vignan pridas sei diferaintas canzùns da rap. Egn digls possessurs da quel studio e igl Andreas Burri c’e carschieu sei a Seglias an Tumleastga. La musica e schon davent c’el e sto dudesch ons sia grànda passiùn. La FMR â visito igl Andreas Burri an sieus studio da musica a Tusàn.

Cun egn grànd surir vean igl Andreas Burri, ca sanumna cun num artistic Burri Smalls, anviers la staziùn a Tusàn. El e gest sto agl studio da musica ca s’oda ad el a seas amitgs.

Ussa peia satgata quel studio cugl num «-6 studio» amiez la staziùn da trens. Mo noua? Igl Andreas Burri va cun la clav tier igl lift ca culeia igl parcadi digl Coop cun la staziùn da tren. Tgi c’ancanuscha igl liac, sa c’igl lift â atgnameing me tschentg ulzadas. Mo cun quella clav po el manar l’aszensur sis ulzadas sut la teara, peia agl -6 – quegl sclarescha ear gest da noua ca l’inspiraziùn e vagnida pigl num digl studio.

El sez fa schon par anzaquànts ons part da la szena da rap digl Grischùn. Dantànt gartegia quegl blear durànt sieus tains liber. Durànt igl gi lavura el agl comerzi da detagl. Ascheia gudogna el igls seas raps cun egna lavur «normala», a la musica resta sia passiùn trànter la lavur a durmir. El passainta blear tains agl -6 studio: «Qua se jou propi lucantar bagn.» Quegl mùnta c’el va betga me agl sieus studio par far musica, mobagn ear par passantar tains cun seas amitgs. Egn’ea â schizund egna band da metal prieu sei lur album agl studio digl Burri ­Smalls a seas partenaris.

Igl Andreas Burri e naschieu igl on 1992 a carschieu sei a Seglias an Tumleastga. L’amur par la musica, spezificameing igl rap, â el scurvato da giuven. Cunquegl â el ear diferaints modèls c’ân inspiro el par sia passiùn da la musica. Egn da quels e sto igl rapper american The Notorious B.I.G. c’â ear sanumno Biggie Smalls. «Quel e ieu agl studio ad a fatg igl sieus rap or digl tgieu, tut freestyle. Parve da quegl e el egn’inspiraziùn. Igl dat pocs ca san invantar egn text aschi spontan. Freestyle rap e egna disziplegna roiala», manegia igl Burri Smalls.

Igl sieus num artistic e ascheia ear egn’imitaziùn da sieus idol american. Egna tgossa fetg impurtànta par el e c’el fa musica da rap suletameing par dialect tudestg. Ear el â antschiet cun freestyle rap – gest da cantar quegl ca vean or digl sieus tgieu. Quegl â antschiet cun pintgas preschantaziùns par natalezis d’amitgs. Egn’ea â’l ear stgieu far egn workshop cun cunfirmànds.

A Cuira â’l amprieu ad ancanuscher egn amitg: par anquals ons e el alura sto agl tains liber sen tura cun el. Egn cumbat da talent a szenas en suandos. Cugl tains â el ear amprieu ad ancanuscher egn digls seas migliers amitgs, ca s’oda ear oz ànc tier igls migliers. Anzemen ân els gieu egna pintga stànza a Domat: «Nus vevan nign’ideia tge ca nus fagevan, prinzipal e sto ca nus vagn prieu sei musica.» Dantànt â el durànt que tains gieu ple pocas szenas avànt egn publicum. La parsùna digl Burri Smalls e fetg fearm culieada cun igl studio da musica. Par part s’oda quel gea ad el, ad ascheia raquenta el plagn loscheztga: «Igl studio sez vainsa nus davent igl on 2019.» Quegl e sto igl tains cura c’els ân prieu sei daple musica ad ear fatg videos da musica.

Cun 18 e quella tgossa cugl rap vagnida ampo ple seriusa pigl Burri Smalls. El leva saqualifitgear pigl campiunadi svizer digl rap. Quegl â funcziuno ascheia ca dus rappers ân stuieu cumbater egn l’oter – cun texts da freestyle, c’en gest vagnieus or da lur tgieu an que mumaint. Quegl â savieu ir sco savund: Par exaimpel e vagnieu musso egn maletg d’egn elefànt, alura â quegl stuieu easser part da las lingias digl rapper c’e sto landervei. Blear segi quegl sto ascheia, raquenta igl Burri Smalls, ca mintgegn â fatg quater lingias alura e l’oter puspe vagnieu landervei. Las ampremas duas lingias en stadas par sadefender a las ultimas duas lingias par provocar l’adversari.

Dantànt e el mena sto part digl campiunadi svizer ad â dezidieu da bandunar agl: «Jou leva betga adigna ir tras la measadad da la Svizra ad alura gnànc easser part digl campiunadi.» Igl Polenta Jam a Grüsch segi ànc sto ampo egna wild card – tgi c’â gudagnieu là â savieu ir directameing agl final digl campiunadi svizer. Dantànt â’gl ear là mena tanschieu. «Jou ve survagnieu la racunaschientscha, mo sund betga rivo agl final», manegia igl Burri Smalls.

Egn digls seas talents e da preschantar anzatge, betga me la musica – na, par egn tains e el ear sto moderatur par egn cumbat c’e vagnieu preparo egn mains oravànt. Quegl e alura sto agl Grischùn ad egn’ea a Zug. Par quel evenimaint ân igls organisaturs betga me getg c’els dovran igl Burri Smalls, parquegl c’el fa adigna bùn divertimaint; els ân ear amparo tut igls rappers da l’antiera Svizra, sch’els lessan prender part. Quel aschinumno «written battle» e sto ascheia ca mintgegn â savieu preparar lingias ancunter sieus adversari. Els ân gieu sis eandas tains par analisar lur adversari. «Là ân ign stuieu dar adatg tge c’ign meta sen las medias sozialas.»

Igl Burri Smalls â sez pletost publitgieu canzùns singulas near e cumparieu sen albums da seas amitgs. Sez lascha el ànc spitgear segl sieus agen album: «Jou se ànc betga cura ca jou publitgesch egn agen album». «Ple bòld ve jou sasamgnieu d’aver egn studio, mo veva nigns raps. Ussa vainsa egn studio, mo jou se ànc betga cura ca fetsch mieus album.» El segi ear fetg critic ancunter seas agens texts. El sasainta miglier sen la tribuna an acziùn, parquegl sch’el scriva texts segi el amprem adigna cuntaint alura cugl tains betga ple. «Dantànt easser sen tribuna e sco agl film par me. Amprem sund jou narvus. Mo aschi prest sco sund avànt igl publicum, va’gl bagn.» Par el segi igl impurtànt c’igl publicum segi part da la show. Mo tgi sa, forza c’igl on 2025 porta finalmeing igl amprem album digl rapper Burri Smalls.