Ina dallas capo scolas da skis svizras ha 50 onns

«La historia dalla scola da skis da Breil ha entschiet l’entschatta dils onns 1970 cun l’iniziativa d’entgins scolasts da skis da Breil che luvravan sco scolasts da skis a Flem», di Marcel Cathomas, il schef dil comite d’organisaziun dalla fiasta da 50 onns Scola da skis Breil. «1973/74 han ins entschiet a Breil cun l’instrucziun sin pista entras quels iniziants che luvravan a Flem. Ed a Flem era da lezzas uras igl enconuschent Heini Caduff da Breil menader dalla scola da skis.» El hagi susteniu ed animau ils scolasts da Breil da fundar in’atgna scola da skis, quei ch’ils iniziants hagien fatg cun gronda premura e success.

«Ils emprems dus onns han ils quater scolasts da skis piuniers instruiu a Breil cun in contract da scolasts da skis da Flem», di igl organisatur dil giubileum. «1975 han els lu fundau ufficialmein la scola da skis da Breil.»

In’entschatta fetg sempla

En discuors cun la FMR raquenta Marcel Cathomas che la scola da skis da Breil seigi vegnida fundada sco uniun. Da lezzas uras eri ella affiliada all’uniun da cura e traffic da Breil. «Quella fageva l’entira administraziun. Nossa scola da skis era denton in’atgna uniun cun in agen president ed in meinagestiun.» Sco Marcel Cathomas di, seigi Venanzi Cantieni permiert staus igl emprem menader dalla scola. El engaschavi scolastas e scolasts e fagevi ils contracts e las pagas.

En quella fuorma e cun quei menaschi hagi la scola da skis da Breil existiu entochen 1990. Lu hagi ins fundau l’Associaziun scola da skis Breil/Vuorz/Andiast. E naven da quei mument hagi ins saviu daventar commembra ni commember dalla Scola da skis che haveva ussa era statuts e cheutras ina legitimaziun giuridica, declara Marcel Cathomas. «Daventai ils emprems commembers ein da lezzas uras quels ver 15 scolasts da skis che havevan acquistau la patenta grischuna e luvravan sco scolasts da skis a Breil.»

Ina dallas bunas scolas svizras

«La scola da skis da Breil ei sesviluppada e carschida entochen il di dad oz», declara Marcel Cahomas. Enteifer 50 onns hagi la scola giu quater menaders e tuts seigien stai indigens romontschs:  Venanzi Cantieni, Gieri Cathomen, Maurus ­Tomaschett e dapi igl onn 2013 vegni la scola da skis menada da Gion Carigiet. «Mintga scolasta e scolast da skis en nossa scola vegn era clamaus cul prenum e buca cun ina numera. Quei ei in impurtont factur da qualitad per ina instituziun», di Marcel Cathomas. «Il pli impurtont per mintga scolasta e scolast ei ch’el s’identificheschi cun il sport da skis en tut sias disciplinas e cun la lavur ch’el fa sco scolasta ni scolast da skis.»

In niev ressort

«Suenter ch’il ressort Pradas a Breil ei vegnius realisaus avon paucs onns, havein nus dalla scola da skis baghegiau in niev center da scola da skis per nossa scola. In baghetg cun ina fetg moderna infrastructura che vegn appreziada fetg da nossa clientella», di Marcel Cathomas. La scolaziun per aquistar la patenta federala da scolasta ni scolast da sport silla neiv ei modulara e dividida en quater parts. «Nus a Breil havein sco las biaras scolas da skis scolastas e scolasts da tuts scalems modulars. Quei simplifichescha era da planisar la lavur», manegia Marcel Cathomas.

Orda scolaras datti scolastas

Las scolastas ed ils scolasts da skis han quasi tuts aunc in mistregn ni fan in studi dasperas. Marcel Cathomas di ch’ei detti era aunc adina purs ch’instrueschien ella scola da skis da Breil. «La gronda part da nossas scolastas e scolasts da skis ein denton anteriuras scolaras ed anteriurs scolars, fetg savens da famiglias che han tier nus ina habitaziun da vacanzas. Da 120 contracts da lavur havein nus circa 90 contracts cun anteriurs scolars dalla scola da skis.» Il menader dalla scola stoppi quasi mai inserir per encurir scolastas e scolasts.

Il Gigi d’Arosa ei tempi passati

Marcel Cathomas confirmescha che la scola da skis da Breil hagi era suenter 50 onns ina buna reputaziun. «Il Gigi d’Arosa sco scolast duront il di ed accumpignader duront la sera e la notg haiel jeu strusch enconuschiu a Breil.» Ei detti bein singulas scolastas e scolasts che suondien ad invitaziuns da hosps, mo quels che fetschien quei hagien la patenta svizra e renconuschien cunquei era las reglas da cumportament. «Jeu mez sundel sco giuvenot scolast da skis staus inagada en ina situaziun ch’ins vuleva obligar mei sco accumpignader sper la scola da skis. E jeu sun silsuenter staus leds d’esser mitschaus cun insister da dir na.»

Mo la veta agl ur dalla scola da skis porti massa caschuns da seser ensemen cun scolaras e scolars ed haver legher. Da bials e leghers muments vegni ins era a seregurdar duront las occurrenzas da giubileum da 50 onns dalla scola da skis da Breil, di Marcel Cathomas (mira boxa).