In prau pils indigens

«Cun quella parcella el meglier liug pusseivel sa la vischnaunca prender en mira in ulteriur project che migliurescha la purschida da spazi da habitar per indigens», scriva il president communal ell’introducziun dil «Dialog Flims». Duas jamnas suenter ch’el ei entraus en uffeci renda Christoph Schmidt attent alla votaziun dils 9 da fevrer 2025. «Culla cumpra dalla parcella 784 savein nus far impurtonts pass che Flem resti era egl avegnir in liug attractiv da viver e da habitar», puntuescha il president el fegl d’informaziun local.

Per 45 habitaziuns novas

Realisar quella finamira ei denton cumbinau cun investiziuns. La vischnaunca sa cumprar la parcella 784 per in prezi da 4’073’300 francs. La suprastonza veglia era ida alla tscherca da niev terren da baghegiar. Il project «Gion e Flurina» silla parcella 4002 a Casa d’Uaul vegn daferton realisaus, uonn entscheivan las lavurs per la surbaghegiada per indigens cun 22 habitaziuns en duas casas. Per saver baghegiar ulteriur spazi pagabel per indigens drova la vischnaunca denton schischom. A Flem Vitg, all’entrada dil quatier Plaids, datier dalla casa da vegls e da tgira, seporscha ussa la caschun: La persuna privata ei pronta da vender sia parcella ordvart adattada. Il prezi da 1350 francs il meter quadrat pil prau ei sil livel bass dalla fiera d’immobiglias da Flem. «La surfatscha ella zona da baghegiar e cun ina grondezia da 3’018 m2 lubescha da planisar ina surbaghegiada cun circa 45 habitaziuns da tuttas grondezias», scriva la vischnaunca el «Dialog Flims». Ins sappi, informescha la suprastonza, finanziar l’investiziun cullas entradas dallas taxas che la vischnaunca incassescha da proprietaris che vulan baghegiar habitaziuns da vacanzas.

Segirar Bargis per purschida turistica

Sper quella fatschenta da scaffir habitaziuns per indigens han votantas e votants il davos plaid el capetel pertuccont la cumpra dall’ustria all’entrada dalla Val Bargis. Gia il december vargau ha la suprastonza suttascret il contract culs proprietaris actuals, quei culla resalva che la cuminonza all’urna concedi il credit. La vischnaunca sa cumprar quell’immobiglia per in prezi da 1,93 milliuns francs. «Cheutras ha la vischnaunca la garanzia che l’ustria resta vinavon aviarta e ch’ella stat a disposiziun da stad e d’unviern al turissem», motivescha la suprastonza sia finamira.

La finala ha il suveran da Flem da prender posiziun aunc tiel project da renovar il santeri e construir in ascensur. La suprastonza damonda ina summa da 1,4 milliuns francs per la renovaziun cumplessiva dil santeri ed ina tala da 540’000 francs per construir gl’ascensur. 

Plitost ina formalitad vegn il conclus pertuccont la revisiun parziala dalla planisaziun locala ad esser. Suenter ch’il pievel da Flem haveva refusau il zercladur vargau la proposta dalla suprastonza, ha quella anflau ina via che lubescha da mantener ils orts e contuorn dallas casas. Tenor la nova proposta vegnan quei terren exclus dalla mobilisaziun obligatorica tenor legislaziun federala e cantunala.