Luf arrivà sin la via A13 vers Mesauc

In luf è arrivà mesemna la damaun en il Mesauc sin l’A13 ed ha procurà per agitaziuns. Causa las saivs da protecziun cunter selvaschina n’ha l’animal da rapina grond betg pudì bandunar la via immediatamain. Polizia e surveglianza da chatscha èn vegnids a gidar. Ch’il luf sin la via saja vegnì annunzià mesemna la damaun enturn las 8.00, ha infurmà la Polizia chantunala sin dumonda da l’agentura da novitads Keystone-SDA. Policists e persunas da la surveglianza da chatscha han alura avert en plirs lieus la saiv da protecziun cunter selvaschina. Ma igl ha durà fin suenter las 10.00 fin ch’il luf era mitschà da la via e da la glieud. Igl è mo la segunda giada ch’in luf è arrivà sin l’A13 che maina tras tut il Grischun. Dal 2022 era in luf vegnì sut las rodas dad in vehichel sin l’A13 en vischinanza da Landquart. (sda/fmr)