Cu san ins seser ella «Ustria burgheisa»?

Sper la staziun nova, sin 2170 m s.m., detti ei ina ustria da muntogna. Sin quei punct cun panorama en tuttas direcziuns vegli la vischnaunca burgheisa realisar la «Ustria burgheisa», ha la suprastonza informau l’entschatta avrel 2022. Lu, avon prest treis onns, era la planisaziun dalla pendiculara nova FlemXPress finida ed ins spitgava sill’emprema badelada. Daferton ei la staziun da muntogna Nagens Sura da quei implont niev aviarta ed en funcziun. Sur la Platt’Alva e la Camona da Segnes arva el novas pusseivladads al turissem. Ella vischinonza ei la camona vita da Nagens Sura. Quella ha surviu sco staziun da muntogna d’in runal che las pendicularas da Flem havevan baghegiau ils onns sissonta. E quella staziun veglia vul la vischnaunca burgheisa daLaax trer a néz per in project turistic persistent.

Dependent dil hotel a Murschetg

«Nus baghegiassen l’ustria ed affittassen quella allas pendicularas, haveva il president dils burgheis, Vitus Dermont, explicau avon treis onns alla radunonza generala. Denter dus e treis milliuns francs vegli la vischnaunca burgheisa investir per quei project, haveva la suprastonza communicau als presents. Denter quels Reto Gurtner, el haveva confirmau che sia interpresa vegli preparar las contractivas pervia dalla «Ustria burgheisa». Il president dil cussegl d’administraziun dalla Gruppa Arena Alva ei sez era burgheis dalla vischnaunca da Laax.

Co vesa la situaziun ora oz? Treis onns pli tard dat ei negins indezis d’ina nova Ustria burgheisa a Nagens Sura. Ei ha dau ni ulteriuras informaziuns ed era buca publicaziuns per ina damonda baghegiar. Vitus Dermont conferma sin damonda dalla FMR. «Nies project oriund era memia gronds, aschia che nus havein stuiu redimensiunar el», gi el e conferma ch’ei detti oz negins plans concrets pil project gastronomic sin 2170 m s.m.

Ei dat gia treis ustrias

Aunc ussa buca. Vitus Dermont fa allusiun ad in project pendent dalla vischnaunca burgheisa da Laax. Era da lez haveva la suprastonza burgheisa informau gl’avrel 2022. Ella haveva numnadamein suttascret il contract pil dretg da baghegiar da 99 onns culla gruppa Fortimo. Ils frars Philipp e Remo Bienz vulan baghegiar a Murschetg, agl ur dalla Val Draus, in grond hotel cun combras e habitaziuns. Pil project tenor il concept «Revier» e «Privà» investeschan ils interprendiders da Sogn Gagl denter 40 e 45 milliuns francs.

Tgei connex ha quei project denton culla «Ustria burgheisa» a Nagens Sura? «Sco ch’ei va vinavon cul project dil hotel havein nus dabien mintg’onn in tscheins da 72’000 francs. Quei mument reactivein nus Nagens Sura», rispunda Vitus Dermont. In recuors ch’ei pendents avon dertgira emprova d’impedir ni retardar il project Murschetg dalla gruppa Fortimo. Il president dils burgheis deplorescha ch’il cass setrai ella liunga e che la dertgira lai spitgar cun prender in conclus en caussa.

Concept nunconvenziunal

Ei la Gruppa Arena Alva, sco gestiunaria dalla futura Ustria burgheisa a Nagens Sura, insumma aunc interessada d’in tal menaschi? Igl ei numnadamein in fatg ch’ei dat en in stretg radius gia oz treis ustrias, numnadamein l’ustria Stalla ch’ei en possess dalla vischnaunca politica da Laax, sco era il hotel Nagens e la camona da Segnes ch’ein en possess dallas pendicularas. Vitus Dermont renda attent al concept dalla futura «Ustria burgheisa». Lur idea fussi da realisar in menaschi cun standard nunconvenziunal, ina ustria cun service ed accents gastro-culinarics. Beneventass la futura gestiunaria, la Gruppa Arena Alva, aunc adina il project Nagens Sura? «El ei sistius pil mument», lai il post da medias saver cuortamein la FMR. La plidadra Martina Calonder puntuescha denton: «Ad interim havein nus mess en truchet quei project, demai che auters han actualmein prioritad. Nagens Sura ei denton buca satrau.».