In lev barbagiat enturn la bucca

Tge cabaret che quai è stà durant in onn! Ina dispita cumediantica tranter rivals medials – dad ina vart il RSO/Radio Grischa e da l’autra vart il Radio Alpin/Radio Grischa. Reschissur dal cabaret è stà l’Uffizi federal da communicaziun (UFCOM/BAKOM) cun sia surdada da concessiun per in radio privat local en il Grischun e Glaruna. L’uffizi aveva surdà la concessiun al duo Bühler/Schawinski enstagl dal concern medial dals Lebruments.

Ma tge resta uss a la fin, suenter la decisiun definitiva dal Tribunal administrativ federal? – I restan mo perdents. Ed i resta, sco suenter mintga cabaret, in lev barbagiat en ils musculs da rir e cridar. Ma tgi ha tut pers?

Pers sur tut la lingia ha il pionier da radio Roger Schawinski. Ses gronds pleds per in radio independent grischun che porscha ina vasta infurmaziun en pliras linguas, quels tunan bain. Però las empermischuns restan maculatura, bustabs sin palpiri. Roger Schawinski e ses cumpagnun Stefan Bühler na survegnan betg la schanza da cumprovar, sch’els fissan propi stads pipa per realisar in tal radio. Sche la sentenza dal tribunal è ussa formalistic-pedantica u betg, quai è atgnamain irrelevant. Process giuridics èn adina formalistics ed er il radio da Schawinski e Bühler era gea atgnamain mo palpiri, mo furma.

Pers ha però era la chasa da medias Somedia, schegea ch’i han ussa reconquistà lur concessiun. Ma gia mo il fatg ch’els han – suenter tants onns d’experientscha da radio – pers l’onn passà quella concessiun, quai è stada ina brava blamascha che dola anc adina. Ils Lebruments èn uss en duair da porscher, cun quels 2,8 milliuns francs ad onn – e cun il nov-vegl num «Radio Grischa» – in emettur che correspunda tant a las pretensiuns da Berna sco er a las aspectativas da l’auditori. En spezial las dispitas e midadas pervi dal num «Radio Grischa» n’han betg gista mussà gronda suveranitad en il manaschi. I spetga damai magari blera lavur tar la Somedia, per reparar la reputaziun.

Pers ha en mintga cas er il BAKOM. Enfin ussa survegniva l’uffizi per regla raschun davant il Tribunal administrativ federal en dumondas da concessiun. Questa giada betg. Cun raschun. Perquai che la surdada a Schawinski/Bühler aveva propi fatg surstar avant in onn, betg mo perquai ch’ils dus interprendiders-iniziants van vers ils 80. Ma sch’ins legia la valitaziun dal BAKOM, la quala ha manà a la surdada a Schawinski/Bühler, lura ves’ins, che la surdada era detg casuala. Il sistem da puncts e criteris dal BAKOM è talmain arbitrar, ch’il resultat final avess era pudì ir en direcziun da la Somedia. Mo in exempel che concerna il rumantsch: En lur proposta per ina rapportaziun rumantscha al radio avevan Schawinski/Bühler survegnì dapli puncts che la Somedia. Els avevan numnadamain menziunà che la rapportaziun rumantscha vegnia fatga en collavuraziun cun la Fundaziun Medias Rumantschas (FMR). Ma quella redacziun na fa gea betg radio! E surtut n’ha il duo Schawinski/Bühler mai contactà avant la FMR. E tuttina èn era quels puncts stads a la fin decisivs per lur victoria.

Ma sch’i dat tants perdents, lura datti segir insanua insatgi che ha gudagnà – in terz u quart che profita? Forsa èn quai ils auditurs e las audituras? Forsa ha la dispita gea dà novs impuls? En mintga cas ha il cabaret dal davos onn mussà co ch’ins pudess far in radio detg divertent. In radio che fa in lev barbagiat enturn la bucca.