La voluntad da Valsot

La vischnanca da Valsot ha pers davant dretgira. Ma er als giavischs dals Quadronis n’ha la dretgira dà nagina suatientscha. La situaziun resta pia sco ils ultims quatter onns. La chamona tutga als Quadronis. Il terren tutga a la vischnanca. Igl è ina situaziun da pat.

Ma forsa è quest pat gist ina schanza. Empè da trair vinavant il cas a la proxima instanza, fiss il temp madir per ina soluziun pragmatica. Il vegl president communal, sut il qual il plant è vegnì davant dretgira, n’è betg pli en uffizi. Valsot ha in nov president communal.

Quel ha ertà questa pendenza che custa Valsot cun mintga instanza da dretgira plirs dieschmilli francs. Ina chaussa è numnadamain clera: L’advocata da Valsot survegn adina ses salari – importa nagut, sche la vischnanca perda u gudogna il plant. Il pajataglia da Valsot sbursa ils quints da l’advocata e da la dretgira.

Ma gnanc exnum ils custs duessan esser il motiv per seguir uss ina via da la sauna raschun. Anzi, la suprastanza da Valsot che decida davart cuntinuar la via giuridica u betg duess sa regurdar a la radunanza communala dal december 2020.

Lezza ha decidì cun clerischma maioritad da prolungar trenta contracts da construcziun. 29 contracts ha la suprastanza suenter prolungà, sulettamain quel cun la famiglia Quadroni betg. Suenter avair pers davant dretgira fissi uss in bun mument da tegnair quint a la voluntad da la radunanza communala d’avant quatter onns e finalmain conceder als Quadronis quest dretg da construcziun sco a las autras 29 famiglias era.