Il tat dal retg

Nus essan retgs! – Il Grischun ha cun Armon Orlik ses emprim retg da lutga. Ed il lutgader da Maiavilla è stà ils davos dis en tuttas gasettas, televisiuns e radios da quest pajais. Però la preistorgia ha atgnamain cumenzà bler pli baud, numnadamain en ils onns 1950, cura ch’in giuvenot da la Tschecoslovachia è fugì or da ses pajais, perquai ch’el na vuleva betg entrar en l’armada dal stadi communistic.

Geabain, quai è l’istorgia da Gieri Orlik, il tat dad Armon e Curdin Orlik e da blers auters Orliks grischuns. Sia biografia è atgnamain in’istorgia europeica, svizra e sursilvana enina. Igl è l’istorgia dad in um ch’è fugì en giuvens onns or da ses agen pajais, ch’è sa denunzià sez a Berna tar la polizia, ch’ha chattà lavur en Sviz­ra, ch’è s’inamurà en ina Sursilvana e ch’ha lura tratg si a Disla cun sia dunna Luisa ina famiglia da nov uffants. Quell’entira aventura ed istorgia da vita ha Gieri Orlik barmier raquintà l’onn 2015 en l’emissiun Profil dad RTR. Atgnamain n’aveva el gea betg num «Gieri». A Bohumín (Tschechia) era el creschì si sco Gerhard Georg Orlik (1933 – 2022).

Da tadlar ussa, trais onns suenter sia mort, en occasiun da la victoria da ses biadi Armon, anc ina giada il Profil dad RTR è smaladet interessant e per part era divertent. Perquai che Gieri Orlik era in grondius raquintader. Sco um talentà da linguas discurra el in rumantsch sursilvan che fa surstar e che lascha sortir adina puspè ses bun umor, per uschè dir in umor tschec-sursilvan.