Donnas clevras sen tribuna
Ainten blers tocs digl teater popular vignan las donnas mussadas an rollas stereotipas. Chegl n’è dantant betg igl cass tar igl toc da tschever dall’uniun da giuventetna Salouf. Scu tgi la co-reschissoura Simona Demarmels ò detg anvers la redacziun, èn las figuras da donnas an «Per las veias da Salouf» fermas, clevras e centralas per l’istorgia. Pinavant spetgan er ples surpresas sen igl public.
Igl pour Giatgen è tot oter tgi simpatic. El cumonda anturn, sa cumporta mal anvers tots e cugliuna dretg e sanester. Ed el è igl protagonist digl toc da teater «Per las veias da Salouf» tgi l’uniun da giuventetna Salouf preschainta proximamaintg ainten la sala polivalenta a Salouf.
Igl pour Giatgen vign tuttegna tutgia da blers evenimaints: en portg vign angulo, sia donna Baba stò eir aint igl spital e turna scu oter carstgang. Ed alla fegn stò Giatgen anc eir ainten perschung, perchegl tg’el ò angano la sieranza. Tensiun e drama accumpognan igl public anfignen alla fegn.
La FMR ò discurria cun la co-reschissoura Simona Demarmels davart igl nov toc dall’uniun da giuventetna Salouf e davart surpresas sen las qualas igl public dastga sa legrar.
FMR: Ainten la descripziun sa tschainta igl pour betg simpatic Giatgen an perschung. Damai na dattigl betg en happy-end?
Simona Demarmels: (rei) Chegl na dastga sa tgapescha betg tradeir. Ma i sa tracta dad ena cumegia. La fegn n’è per me scu reschissoura dantant betg schi decisiva …
Igl toc sa nomna «Per las veias da Salouf». Scu ischas nias sen chel tetel?
Igl teater ò atgnamaintg gia en oter nom ainten la sia furma originala tudestga. Chel nom n’ans ò pero betg plaschia schi bagn. La raschung principala per igl tetel è damai sto ensatge oter: Nous vagn pacheto or siva da blers onns puspe eneda las culissas viglias. Ser Duri Lozza, igl vigl prer da Salouf, ò malagea da sias ouras las culissas, e sen chellas èn se tranter oter er las dus muntognas da Salouf e la baselgia.
Dattigl ensatge ve da chel teater tgi Az plai igl migler?
Bunamaintg adegna èn teaters populars gio plagn clischés, cunzont chegl tgi pertotga las rollas dallas donnas. Igl è sto fitg grev da cattar en toc noua tgi chegl n’è betg uscheia. Scu donna na cat ia chegl betg adegna schi «lässig», schi las donnas èn per exaimpel adegna las noschas u las stentousas. An chel senn dat igl noss toc en po cuntervent. Ia va l’impressiun tgi cò èn las donnas fermas e clevras ed on ainta mang la batgetta.
Quantas donnas gioian alloura ainten chel toc?
Fix gioian treis donnas, ed alloura è involvada anc ena quarta … Chegl è dantant ena surpresa. Sen la foto (varda foto) ins vei chella davosvart.
L’uniun da giuventetna Salouf è fitg activa. Ègl sto grev da cattar actouras ed actours per igl teater?
Atgnamaintg catainsa mintg’onn fitg flot actouras ed actours. Anc profitainsa er dallas fermas annadas. Ma chegl vign pi prubabel er a sa midar ensacuras.
Scu vez vous scu reschissours repartia las rollas?
Ia e mies cusregn Riccardo Demarmels faschagn gio siva da blers onns la reschia e cunaschagn er relativamaintg bagn igls giuieders e las giuiedras. Uscheia tgi nous faschagn igl amprem ena preschelta. E siva dastgan er las giuiedras ed igls giuieders decider anc sezs da tge tg’els on gost.
Sen tge dastga igl public sa legrar spezialmaintg?
Ia crei tg’el dastga sieiramaintg sa legrar dallas belas culissas. E naturalmaintg anc daple dallas interpretaziuns digls giuieders e dallas giuiedras. Mintgign ò la sia moda da rabagler or igl maximum or dalla sia rolla. Pi anavant vainsa, l’antiera gruppa da teater, integro egna u l’otra tematica tgi ò occupo chest onn l’antiera val e perfign igl antier mond. Chegl dat franc er en po spazi per discussiuns siva igl teater, perfign politicas. Ma daple na deia ossa betg, perchegl tgi duess er far marveglias da neir a Salouf.
Igl toc «Per las veias da Salouf» (translato da Luzia Plaz) vign musso sonda, igls 14 da favrer 2026 a caschung digl tschever a Salouf. La prova generala antscheva allas 14.00 ed è publica. La preschentaziun principala antscheva allas 20.15. Siva igl teater dattigl ena notg libra ed allas 24.00 sunga la gugga «Igls Fetters Sursetters». En’annunztga n’è betg necessaria.
Gust da leger dapli?