L’identitad stò anc sa sviluppar

Avant diesch onns, igl 1. da schaner 2016 è naschia igl nov cumegn da Surses tgi sa cumpona digls nov anteriours cumegns da Salouf anfignen Beiva. Per igl mastral Daniel Wasescha èn igls diesch onns passos fitg spert.

El ò surpiglia igl sies post l’antschatta 2024 digl sies antecessour Leo Thomann tgi ò presidiia igl cumegn a parteir dalla fusiun. Ena festa da fusiun na vignigl betg a dar an Surses siva diesch onns, dei Daniel Wasescha alla FMR. «Nous nign pero a tematisar la fusiun an diversas contribuziuns ainten la gasetta dall’Uniun turistica da Surses.» Igl mastral ò menziuno divers projects tg’èn nias realisos igls davos onns. Tranter chels sa catta er la nova scola tgi vign inaugurada aint igl decurs dalla stad 2026. «A caschung da chell’inauguraziun dattigl ena festa per la populaziun.»

Nova lescha da biagier

Sper igl nov luvratori communal tg’è er prest fitto, menziunescha igl mastral anc la planisaziun locala tg’igl cumegn sottametta alla radunanza communala igls 9 da mars 2026. «A chella caschung decida la radunanza communala er davart la nova lescha da biagier.» Siva dalla fusiun èn anc stadas an vigour las differentas leschas digls anteriours cumegns. Daniel Wasescha chinta fermamaintg tgi la radunanza communala accepta la nova planisaziun scu er la lescha da biagier unifitgeida tgi vala per igl antier cumegn.

Grev da dar damogn

Or dalla sia optica è la decisiun dad avant diesch onns da fusiunar stada la dretga decisiun. Daniel Wasescha dei tgi las pretensiuns anvers igls cumegns creschan ad en crescher. «Ia na crei betg tg’igls singuls cumegns savessan dominar sulets tot chellas novas sfeidas.» Ed igl mastral menziunescha igl Center da sanadad a Savognin tgi ò duvro ferm sustign digl cumegn. «Schi mintga singul cumegn vess gia da decider davart igl sustign vessan nous svelt ena situaziun scu per exaimpel an Nagiadegna Ota.» Igl mastral fò er attent alla collaboraziun regiunala cun igls cumegns dalla Regiun Alvra. «Sainza las restructuraziuns communalas ainten la regiun fissigl bler pi cumplitgia da collaborar.»

Tgi l’administraziun communala seia neida pi flentga antras la fusiun na so Daniel Wasescha betg confirmar. «I dovra pero bler pi paca gliout aint igls gremis politics.» Anfignen ossa para dad esser avantmang igl interess per igls uffezis communals an Surses. Per igls posts an suprastanza ègl do a caschung dalla davosa elecziun communala an mintga cass daple interessentas ed interessents tgi sezs tg’èn stos dad occupar.

En zichel pi critic

En zichel pi critic sen igls fretgs dalla fusiun varda oz igl anteriour mastral da Tinizong/Rona, Gion-Franzestg Schaniel. «Las veias èn davantadas en bel po pi lungas», dei el. Veias pi lungas per cattar schliaziuns tg’ins saveva avant reglar pi svelt aint igl agen cumegn. E Gion-Franzestg Schaniel n’è betg propi sieir, schi la solidaritad tranter las singulas vischnancas funcziunga aint igl nov cumegn. 

Chella solidaritad mantga er ad ena donna tgi veiva a Salouf e tgi na vot per tot prietsch betg liger igl sies nom ainten la gasetta. Ella dei d’aveir igl sentimaint tg’igl cumegn da Surses exista sulettamaintg da Savognin. E tgi seia da batter, sch’ins viglia contanscher ensatge per l’atgna vischnanca. «Nous vagn stuia batter per salvar la nossa buteia a Salouf.» Aglmanc desista igl cumegn per treis onns digl tschains per igl edifezi dalla buteia da Salouf. Igl mastral è cunsciaint tg’igl spiert communal per igl antier cumegn n’è betg anc sviluppo fitg siva diesch onns. Daniel Wasescha dei tgi la populaziun sa resainta anc adegna pitost scu part dalla singula vischnanca tgi digl antier cumegn da Surses ed agiunta: «Chegl sa meida pero tar la proxima generaziun tgi vo communablamaintg a scola a Savognin.»