Lectura Rumantscha

Schluppettar u betg schluppettar

Has ti anc la survista dals lufs en il Grischun? – Da princip stos ti be savair ch’il luf vegn regulà proactivamain. Vul dir ch’ins schluppetta in u l’auter exemplar, ma ch’i cumpara tuttina qua e là in nov triep. Ma halt, apparentamain n’èsi betg uschè simpel. Cunter quest «courant normal» s’exprima numnadamain l’expert da lufs Peter A. Dettling. Tenor el n’è la regulaziun proactiva betg la schliazun dals problems cun il luf. Na, la regulaziun chaschunia schizunt problems.

In masterplan per il pled da l’onn

Igl è anc memia baud per tscherner il pled da l’onn 2026. Tuttina hai jau gia chattà in favurit, numnadamain «masterplan». Da quels datti adina pli savens: A Vaz datti il «Masterplan Heidsee», en il Surses il «Masterplan Bike» ed en Surselva il «Masterplan enturn il Mundaun» da las vischnancas Lumnezia e Sursaissa/Mundaun en collavuraziun cun las pendicularas. La finamira da quest ultim è da promover cun investiziuns considerablas (prest 25 milliuns francs) il turissem da stad e d’enviern en la regiun. Mes «masterplan» è perquai che «masterplan» daventia il pled da l’onn – senza stuair investir memia bler.

Agitaziun a plaun communal

I na fiss betg stada ina schliaziun eleganta, ma ella avess forsa chaschunà per damain agitaziun ed attenziun: En teoria avess Marcus Beer, il president communal da Glion, simplamain pudì prender per enconuschientscha la petiziun davart il parcar e silsuenter bittar ella en il chanaster da palpiri. Aber eba, quai è be teoria. En la pratica na discuteschan ins ussa betg mo dal cumportament dal president, mabain era da la constituziun communala.

Bun divertiment cun la Lectura Rumantscha!