Lectura Rumantscha
FMR
Expansiun è in tipic pled dal jargon economic. Tar mai sveglia quel dentant adina in zichel snavur. Però en sasez na sto quai betg adina esser il cas, sco che la Lectura Rumantscha dad oz mussa.
Ils «pops» rumantschs
La lingua rumantscha vegn adina diminuida pli fitg – u ch’il tudestg la stgatscha u che las pledadras ed ils pledaders fan memia paucs pops. Ils motivs èn differents. Entant datti però ina pitschna expansiun dal rumantsch, era sch’igl è be in pitschen radi da speranza. Ils curs da rumantsch a distanza che la Lia Rumantscha porscha en tut la Svizra online a scolaras e scolars dal stgalim superiur, èn in success. Ina gruppa da quels giuvenils passenta gist in’emna culturala a Lavin. E tgi che ha forsa pensà sco jau che blers hajan in tat sursilvan u ina tatta engiadinaisa, ha sbaglià. L’expansiun rumantscha viva.
Tegnair a mastrin la bova
I vegn a dar in rempar d’expansiuns enormas. Dal plazzal na vesan quels e quellas, che vegnan ina giada a profitar da quel stabiliment, dentant nagut. Il rempar sur Schluein ch’è gist en construcziun duai proteger il vitg e la colliaziun da traffic da grondas bovas. La FMR ha fatg visita sin il plazzal da quel rempar che duai metter cunfins a l’expansiun d’ina bova gigantica.
Sche la cultura expandescha
La Tur Alva, la Villa Carisch, l’Hotel Liun. – Quai èn be in pèr bajetgs che Origen ha restaurà u construì. Jau hai gia daditg pers la survista. Ed uss agiuntescha quella instituziun culturala en ses portfolio anc in ulteriur edifizi, numnadamain il Piz Mitgel a Savognin. Quel duess daventar ils proxims onns in hotel da cultura e furmaziun. Jau hai dentant il sentiment che quai na vegn betg ad esser la davosa expansiun da Giovanni Netzer e cumpagnia.
A revair e bun divertiment cun la Lectura Rumantscha!
Gust da leger dapli?